ច្បាប់គ្រប់គ្រងថ្នាំកសិកម្ម និងជីកសិកម្ម នឹងធ្វើឲ្យសេដ្ឋកិច្ចជាតិរីកចំរើនដោយ អៀត ដារ៉ាវុធ ថ្ងៃពុធ ទី31 សីហា ឆ្នាំ2011 |
អង្គការសេដាក បានស្វាគមន៍ចំពោះ ទីស្តីការគណៈរដ្ឋមន្ត្រីដែលបានអនុម័ត លើសេចក្តីព្រាងច្បាប់ ស្តីពីការគ្រប់គ្រងថ្នាំកសិកម្ម និងជីកសិកម្ម នាពេលកន្លងមក ដោយថា ច្បាប់នេះនឹងធ្វើឲ្យសេដ្ឋកិច្ចជាតិរីកចំរើន។ តាមរយៈសេចក្តីថ្លែងការណ៍របស់មជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា ហៅកាត់សេដាក នៅថ្ងៃទី៣១ ខែសីហានេះ គឺបានបង្ហាញថា ក្នុងរយៈពេលជាង ១៤ ឆ្នាំ ដែលអង្គការសេដាកធ្វើការទាក់ទងនឹងកសិកម្មនៅកម្ពុជា គឺសង្កេតឃើញថា ការគ្រប់គ្រងថ្នាំកសិកម្ម និងជីកសិកម្ម ពិសេសការត្រួតពិនិត្យលើការនាំចូលថ្នាំកសិកម្ម និងជីកសិកម្មខុសច្បាប់ នៅមានភាពធូររលុងនៅឡើយ ដោយសារតែគ្មានច្បាប់ស្តី ពីការគ្រប់គ្រងថ្នាំកសិកម្ម និងជីកសិកម្ម។ សេចក្តីថ្លែងការណ៍បង្ហាញថា អង្គការសេដាកគាំទ្រឲ្យមានការបង្កើតច្បាប់នេះ ដើម្បីលប់បំបាត់អំពើអសិលធម៌ក្នុងសកម្មភាពពាណិជ្ជកម្ម ថ្នាំកសិកម្ម និងជីកសិកម្ម ដើម្បីការពារផលប្រយោជន៍កសិករ និងអ្នកប្រើប្រាស់។ សេចក្តីថ្លែងការណ៍បង្ហាញពីការយល់ឃើញថា វត្តមានរបស់ច្បាប់ស្តីពីការគ្រប់គ្រងថ្នាំកសិកម្ម និងជីកសិកម្ម គឺជាការចាំបាច់ និងមានសារៈសំខាន់បំផុត សម្រាប់អភិវឌ្ឍន៍សេដ្ឋកិច្ចកម្ពុជា។ ជាមួយគ្នានេះ សេចក្តីថ្លែងការណ៍បានស្រង់សម្តីនាយកបរិស្ថាន និងសុខភាពរបស់អង្គការសេដាកលោក គាម មករាឌី ផ្សាយថា ច្បាប់ស្តីការគ្រប់គ្រងថ្នាំកសិកម្ម និងជីកសិកម្មនេះ នឹងជួយលើកទឹកចិត្តបន្ថែមទៀតដល់អ្នកវិនិយោគ និងលើកកំពស់សេដ្ឋកិច្ចជាតិ និងបរិស្ថានផងដែរ។ ចំណែកប្រធានអង្គការសេដាកលោក យ៉ង សាំងកុមារ ត្រូវបានសេចក្តីថ្លែងការណ៍ស្រង់សម្តីចុះផ្សាយថា ក្រៅពីការអនុវត្តច្បាប់នេះ ឲ្យមានប្រសិទ្ធិភាព រដ្ឋាភិបាលគួរបង្កើនការលើកស្ទួយកសិកម្មសរីរាង្គ ឬកសិកម្មតាមគោលការណ៍ធម្មជាតិ ដើម្បីធ្វើឲ្យកម្ពុជា មានចំណីអាហារគ្មានជាតិពុល៕ By VOD |
